15 верасьня старшыня Сейма Літвы Юозас Олекас сустрэўся са Сьвятланай Ціханоўскай. Ён падкрэсьліў, што Літва прыкладзе ўсе намаганьні дзеля вызваленьня беларускіх палітвязьняў, паведаміла ELTA.
«Мы вітаем і радуемся з нагоды вызваленьня часткі палітычных зьняволеных. Перажываем, што яшчэ тысяча палітычных зьняволеных далей утрымліваецца ў беларускіх турмах, але сумеснымі намаганьнямі зробім усё, каб гэтыя палітычныя зьняволеныя (...) былі вызваленыя», — заявіў Олекас.
«Нашы сумесныя намаганьні накіраваныя на тое, каб беларусы, якія жывуць тут, маглі адчуваць сябе як дома, каб яны, працуючы і жывучы ў Літве, маглі ўмацоўваць літоўскую эканоміку, і каб сумеснымі намаганьнямі мы маглі бачыць гэты рэгіён больш стабільным і бясьпечным», — сказаў ён.
Паводле палітыка, падчас сустрэчы абмяркоўвалася далейшае прававое супрацоўніцтва паміж Сеймам і ўрадам з мэтай умацаваньня дэмакратыі ў Беларусі і падтрымкі яе дэмакратычных сіл.
ГЛЯДЗІЦЕ ТАКСАМА: «ПіК Свабоды». Блогер «Шэры Кот» і дацэнтка Дуліна пра высылку зь БеларусіУ сваю чаргу, Сьвятлана Ціханоўская, якая прамаўляла па-літоўску, падзякавала Літве за падтрымку дэмакратычных беларускіх сіл.
«Старшыня выдатна ведае Беларусь і шмат гадоў быў нашым голасам у Эўрапейскім парлямэнце», — сказала яна.
«Я ўпэўненая, што разам мы можам умацаваць беларуска-літоўскія адносіны і вырашыць важныя выклікі. Мы працягнем ціск на рэжым Лукашэнкі, каб дасягнуць сыстэмных і незваротных зьмен у Беларусі», — дадала Ціханоўская.
Паводле яе слоў, яны абмеркавалі вучэньні «Запад-2025», становішча беларусаў у Літве, будучае старшынства Літвы ў Радзе ЭЗ у 2027 годзе і падпісаньне дамовы пра супрацоўніцтва паміж Сеймам і дэмсіламі Беларусі.
«Наша мэта — прынесьці свабоду Беларусі і, вядома, вярнуцца дадому. Для нас Літва ёсьць прыкладам прынцыповасьці, трываласьці і мужнасьці. Мы як беларускі народ ніколі гэтага не забудзем», — адзначыла Сьвятлана Ціханоўская.
ГЛЯДЗІЦЕ ТАКСАМА: Сьпікерам Сейма Літвы стаў Юозас Олекас, які піша лісты беларускім палітвязьням