Ужо сёньня: Гадавіна пачатку далучэньня Заходняй Беларусі да БССР, дзень народзінаў Генадзя Карпенкі

Дата дня

17 верасьня 1949 году нарадзіўся Генадзь Карпенка, палітык, навуковец, удзельнік нацыянальна-дэмакратычнага руху 1990-х.

31 сакавіка 1999 году Генадзь Карпенка быў дастаўлены ў 9-ы менскі клінічны шпіталь з дыягназам «крывацёк у мозг». 1 красавіка яму зрабілі апэрацыю па выдаленьні гематомы. Карпенка памёр 6 красавіка.

Сьмерць палітыка была нечаканай, бо да таго ён ніколі ня скардзіўся на дрэннае здароўе. Карпенка памёр за месяц да альтэрнатыўных прэзыдэнцкіх выбараў, прыхільнікі правядзеньня якіх адмовіліся прызнаць навязаныя Лукашэнкам зьмены ў Канстытуцыі, што працягвалі тэрмін ягоных паўнамоцтваў на два гады.

Празь месяц пасьля сьмерці Карпенкі бясьсьледна зьнік адзін зь яго найбліжэйшых паплечнікаў — Юры Захаранка, яшчэ праз паўгоду другі — Віктар Ганчар. Некаторыя людзі, у тым ліку сваякі Карпенкі, зьвязвалі гэтыя падзеі ў адзін ланцуг.

Гэты дзень у гісторыі

1590 — вялікі князь і кароль Жыгімонт ІІІ даў гораду Лідзе Магдэбурскае права і герб.

1784 — у Нясьвіжы адбылася прэм’ера опэры Яна Голянда і Мацея Радзівіла (лібрэта) «Агатка».

1794 — Крупчыцкi бой. Найбуйнейшая бітва паўстаньня, дзе расейскімі войскамі кіраваў Аляксандар Сувораў, а войскамі ВКЛ — Караль Серакоўскі. На дапамогу Серакоўскаму прыйшлі тры тысячы сялян-касінераў. Усяго ў бітве з двух бакоў удзельнічала больш за 20 тысяч чалавек. Дзея адбывалася каля вёскі Крупчыцы цяперашняга Жабінкаўскага раёну.

1787 — у Філядэльфіі прынятая Канстытуцыя ЗША.

1939 — Чырвоная Армія пачала паход у Заходнюю Беларусь і Заходнюю Ўкраіну.

1939 — польскі прэзыдэнт, урад, замежныя дыпляматы пры ўрадзе, галоўнакамандуючы, прымас ды іншыя асобы пакінулі Польшчу і перайшлі ў Румынію, дзе былі інтэрнаваныя.

1993 — апошнія расейскія вайсковыя злучэньні пакінулі Польшчу.

2020 — затрымалі каардынатарку Валянтэрскай службы «Вясны» Марфу Рабкову. Пазьней праваабаронцу абвінавацілі па шэрагу артыкулаў Крымінальнага кодэксу за падзеі 2016–2020 гадоў і асудзілі на 15 гадоў зьняволеньня.

2020 — у Горадні адкрылі бронзавы помнік апекуну гораду сьвятому Губэрту.

2021 — у Беластоку адкрыўся музэй памяці сасланых у Сібір пасьля 17 верасьня 1939 году.

У гэты дзень нарадзіліся

1774 — Тадэвуш Тышкевіч, дзяржаўны і вайсковы дзяяч ВКЛ, удзельнік паўстаньняў 1794 і 1831 гадоў, вайны 1812 году на баку Напалеона ды іншых войнаў.

1857 — Канстанцін Цыялкоўскі, расейскі навуковец у галіне касманаўтыкі.

1860 — Кандрат Лейка, празаік і драматург, пачынальнік беларускай дзіцячай літаратуры.

1891 — Аркадзь Смоліч, дзяяч нацыянальна-дзяржаўнага адраджэньня, адзін з тэарэтыкаў беларускай сацыял-дэмакратыі, адмысловец у галіне геаграфіі, эканомікі, картаграфіі, міністар сельскай гаспадаркі БНР.

1898 — Павал Крынчык, дзяяч беларускага руху ў Заходняй Беларусі, публіцыст.

1907 — Сяргей Дзяргай, беларускі паэт і перакладчык.

1912 — Максім Танк, народны паэт Беларусі.

1922 — Уладзімер Калесьнік, беларускі пісьменьнік, літаратуразнавец, крытык, пэдагог.

1959 — Сяргей Дубавец, літаратар і публіцыст, першы рэдактар адноўленай у 1991 годзе газэты «Наша Ніва».

У памяці

1999 — Віктар Вуячыч, сьпявак, народны артыст Беларусі.

2013 — Віктар Маркавец, мастак, удзельнік нацыянальна-дэмакратычнага руху 1980-х — пач. ХХІ ст.