Як адзначаецца ў афіцыйным паведамленьні, закон праекту прадугледжвае ўвядзеньне крымінальнай адказнасьці за паўторнае парушэньне цягам году правілаў увозу, захоўваньня, абарачэньня, вытворчасьці і эксплуатацыі цывільных дронаў і авіямадэляў.
Праект закону распрацавалі і ўхвалілі для «забесьпячэньня нацыянальнай і грамадзкай бясьпекі, а таксама для бясьпекі палётаў пры выкарыстаньні паветранай прасторы Беларусі».
Гэтым праектам закону ўводзіцца адміністрацыйная адказнасьць за кіраваньне цывільным самалётам, незарэгістраваным у Дзяржаўным рэестры цывільных паветраных суднаў, а таксама за адсутнасьць неабходнай бартавой дакумэнтацыі і права кіраваньня самалётам.
Адміністрацыйная адказнасьць уводзіцца таксама за злоснае ўхіленьне асуджанага ад выкананьня дадатковага пакараньня ў выглядзе штрафу або ў выглядзе пазбаўленьня права займаць пэўныя пасады ці займацца пэўнай дзейнасьцю.
Апроч таго, прадугледжана вызваленьне ад крымінальнай адказнасьці асобы за ўхіленьне ад прызыву на вайсковую службу, ад яўкі на зборы, калі абвінавачаны ў судзе заявіць аб гатоўнасьці пайсьці на службу.
Форум