Ад закрыцьця мяжы з Польшчай пацярпелі раней стабільныя пастаўнікі валюты ў Беларусь — чыгунка і «Беларуськалій»

Закрыцьцё польска-беларускай мяжы «ўдарыла па двух ключавых сэктарах адначасова: транзыце „Кітай — Эўропа“ і экспарце беларускіх калійных угнаеньняў», лічыць «Супольнасьць чыгуначнікаў Беларусі» (СЧБ)

«Калі першыя страты Беларускай чыгункі можна ацаніць дзясяткамі мільёнаў даляраў страчанай выручкі, то для „Беларуськалію“ наступствы маюць больш стратэгічны характар: скарачэньне кантэйнэрнага патоку пазбаўляе кампанію аднаго зь нямногіх працоўных маршрутаў у Кітай», — гаворыцца ў распаўсюджаным ініцыятывай камэнтары.

Акрамя таго, «Беларуськалій» будзе вымушаны «яшчэ мацней спадзявацца на расейскую інфраструктуру, што павялічвае сабекошт і робіць кампанію ўразьлівай да перагрузак у партах Расеі і зьмены тарыфнай палітыкі ў РФ».

Гэта прывядзе да пагаршэньня сытуацыі праз рост лягістычных выдаткаў, зазначаюць аўтары. Разам з тым, лічаць у СЧБ, галоўнае наступства закрыцьця мяжы ня толькі для Беларускай чыгункі (БЧ), але і для «Беларуськалію» палягае ў «зьнікненьні стабільнага патоку парожніх кантэйнэраў з Эўропы пасьля выгрузкі».

Раней, ва ўмовах нармальнай працы чыгуначных памежных пераходаў, пасьля разгрузкі кітайскіх тавараў у Нямеччыне, Польшчы і іншых краінах Эўропы частка кантэйнэраў вярталася пустымі ў Берасьце, патлумачыла ініцыятыва.

«Закрыцьцё польскай мяжы рэзка скараціла прапанову такіх кантэйнэраў. Паток, які раней вяртаўся з Эўропы, зараз заблякаваны. Гэта стварае дэфіцыт тары для экспартных партыящ і вымушае „Беларуськалій“ або шукаць кантэйнэры на расейскім рынку за вышэйшую цану, або скарачаць аб’ёмы адгрузкі», — падкрэсьлівае СЧБ.

Аўтары мяркуюць, што пагаршэньне сытуацыі на мяжы прывядзе да страты Беларускаю чыгункаю часткі транзытных кантрактаў, якія пойдуць на альтэрнатыўныя маршруты праз РФ ці Турэччыну.

Усе гэтыя эканамічна нявыгадныя для БЧ падзеі, як адзначаецца, адбываюцца на фоне «значных запазычанасьцяў», якія яна ўжо мае.

«Фактычна ўжо цягам трох тыдняў эксплюатацыйная праца галіны праходзіць у так званым „рэжыме эканоміі“ праз вымушаны прастой цеплавозаў з прычыны недахопу дызэльнага паліва, адгрузку якога прыпыніў канцэрн „Белнафтахім“ за даўгі па ранейшых пастаўках».

Кожны кантэйнэрны цягнік у сярэднім перавозіць каля 120-130 TEU (адзінка зьмесьціва стандартнага кантэйнэра). Кошт перавозкі аднаго кантэйнэра маршрутам Кітай — Эўропа складае 1,6–3,2 тысячы даляраў. Кітайцы неахвотна паведамляюць зьвесткі пра грузаабарот на маршруце Кітай — Эўропа. Вядома толькі, што ён расьце штогод. У 2022 годзе, паводле транспартна-лягістычнага парталу Infotrans, гэтым маршрутам было перавезена 1,6 млн. TEU. У траўні 2024 году, паведамляў rail-news.kz, было перавезена 186 тысяч TEU.

Як падлічыла СЧБ, «нават калі зыходзіць з таго, што БЧ атрымлівае толькі 10-15% ад кошту кантракту на перавозку ў выглядзе тарыфу за транзыт і выкарыстаньне інфраструктуры, недаатрыманыя даходы толькі ад заблякаваных цягнікоў могуць скласьці да 40-50 млн даляраў ужо да канца верасьня 2025 году — залежна ад колькасьці такіх затрыманых цягнікоў».

Пераходы ў Польшчу для легкавікоў і грузавых машын, а таксама цягнікоў па-ранейшаму закрытыя.

16 верасьня ў Міністэрстве ўнутраных справаў і адміністрацыі Польшчы заявілі, што мяжа застанецца закрытай і пасьля расейска-беларускіх манэўраў і што «рух адновяць, калі мяжа будзе цалкам бясьпечнай».