Зяленскі: Украіна разьлічвае, што прапанаваны Эўразьвязам 19-ы пакет санкцый будзе для Расеі «сапраўды балючым»

«У гэтай зброі знайшлі тысячы замежных кампанэнтаў — больш за 132 тысячы — з розных краіны. Эўропа, Амэрыка, Кітай, Японія і дзясяткі іншых. Усе гэтыя тэхналёгіі дапамагаюць ствараць Расеі зброю ў вялікіх маштабах. Усе дзеля тэрору супраць нашых людзей», — заявіў Уладзімір Зяленскі.

Прэзыдэнт Украіны перакананы, што, калі цяпер Расею не спыніць, то яна стане пагрозай для краін Эўропы і Ціхаакіянскага рэгіёну.

«Моцныя санкцыі — інструмэнт, які дапаможа гэта спыніць. Трэба перакрыць усе магчымыя шляхі паставак, абыходу санкцый, ціснуць на краіны і асобныя кампаніі, якія ім дапамагаюць. [...] Мы разьлічваем, што 19 пакет санкцый Эўразьвязу будзе сапраўды балючым і што Злучаныя Штаты далучацца да эўрапейцаў», — падкрэсьліў Уладзімір Зяленскі.

Эўрапейскі зьвяз прапанаваў чарговае ўзмацненьне санкцыйнага рэжыму супраць Расеі за агрэсію супраць Украіны. У ім прадугледжваюцца абмежаваньні і датычна Беларусі за падтрымку вайны Расеі.

Якія санкцыі прапануюць супраць Беларусі

У праекце рашэньня Рады ЭЗ і ў суправаджальных дакумэнтах Эўракамісіі, датаваных 19 верасьня 2025 году, якія Радыё Свабода атрымала ад крыніцаў у Брусэлі, пералічаныя наступны санкцыі супраць Беларусі:

• Забарону на доступ беларускіх грамадзян і кампаній да крыпта-кашалькоў, электронных грошай і шэрагу плацёжных сэрвісаў. Беларусам будзе таксама забаронена займаць кіроўныя пасады ў кампаніях ЭЗ, якія займаюцца крыпта-актывамі.
• Абмежаваньні на праграмнае забесьпячэньне і тэхналёгіі: пад санкцыі трапляюць кампутарныя сыстэмы кіраваньня прадпрыемствамі, праграмнае забесьпячэньне для прамысловага дызайну і вытворчасьці, банкаўскія і фінансавыя праграмы, а таксама паслугі ў сфэры штучнага інтэлекту, высокапрадукцыйных вылічэньняў, квантавых тэхналёгій і камэрцыйнага спадарожнікавага назіраньня.
• Забарону на экспарт у Беларусь тавараў і матэрыялаў, якія могуць узмацніць прамысловыя і вайсковыя магчымасьці краіны. Сярод іх — шынная і гумовая прадукцыя, мэталі і сплавы, электронныя кампанэнты, аптычныя прыборы, будаўнічыя матэрыялы, транспартныя сродкі і судны.
• Удар па даходах рэжыму Аляксандра Лукашэнкі: пад поўную забарону трапляе імпарт усіх ацыклічных вуглевадародаў (гэтыя хімічныя злучэньні, у прыватнасьці, складаюць асноўную частку прыроднага газу і нафты). Гэта, паводле Брусэлю, павінна скараціць валютныя паступленьні ў беларускі бюджэт.

Разам з тым, санкцыйны пакет прадугледжвае гуманітарныя выключэньні: дазволеныя пастаўкі харчоў, угнаеньняў, мэдыкамэнтаў і мэдычных прыладаў, а таксама дзеяньні, неабходныя для судовых і арбітражных працэсаў у краінах ЭЗ.

У дакумэнтах адзначаецца, што санкцыі зьяўляюцца адказам на працяг «падтрымкі, якую беларускі рэжым аказвае агрэсіўнай вайне Расеі супраць Украіны», і накіраваныя на тое, каб не дапусьціць узмацненьня «вайсковага, тэхналягічнага і прамысловага патэнцыялу Беларусі».