Прэс-служба Мытнага камітэту Беларусі апублікавала паведамленьне аб падаўжэньні тэрміну знаходжаньня польскіх фураў у краіне на 10 дзён. Гэтыя грузавікі не змаглі выехаць у Польшчу да закрыцьця мяжы.
«Зыходзячы з духу добрасуседзтва, ідучы насустрач польскаму бізнэсу, Дзяржаўны мытны камітэт прыняў рашэньне аб падаўжэньні знаходжаньня польскіх фураў на тэрыторыі Беларусі... Для падаўжэньня тэрміну перавозьніку трэба зьвярнуцца ў мытны орган, у рэгіёне дзейнасьці якога знаходзіцца транспартны сродак», — гаворыцца ў паведамленьні ведамства.
16 верасьня МУС Польшчы апублікавала заяву аб праблеме з пастаўкамі грузаў празь мяжу зь Беларусьсю і эканамічных наступствах для кампаніяў. У ведамстве расказалі, што ўрад ацэніць страты і прыме рашэньні аб магчымай дзяржаўнай дапамозе асобным галінам вытворчасьці.
Пры гэтым колькасьць фураў назваў толькі беларускі бок — 1453 машыны, а польскі бок не пацьвердзіў і не зьняпраўдзіў гэтай лічбы.
ГЛЯДЗІЦЕ ТАКСАМА: Польшча канчаткова пацьвердзіла, што не адкрые мяжы зь Беларусьсю пасьля вучэньняў «Захад-2025»