Павал Мажэйка: Я разумею ўчынак Статкевіча

На беларускай-літоўскай мяжы Павал Мажэйка быў у адным аўтобусе зь Міколам Статкевічам, які адмовіўся выяжджаць з краіны. Ён расказаў у эфіры «ПіКа Свабоды» дэталі гэтага здарэньня.

Іншы госьць праграмы – гісторык і палітоляг Аляксандар Фрыдман. Зь ім Дзьмітры Гурневіч размаўляе пра зьдзелку паміж Дональдам Трампам і Аляксандрам Лукашэнкам.

«Я на баку Міколы Статкевіча і лічу, што ён меў права павесьці сябе менавіта так»

Павал Мажэйка: Мы ехалі зь Міколам у тым самым аўтобусе. Я ў самым канцы, а ён напачатку. Калі мы спыніліся літаральна на некалькі сэкундаў перад шлягбаумам, які даваў нам магчымасьць заехаць на літоўскі бок, супрацоўнікі КДБ выскачылі з аўтобуса. У гэты ж момант Мікола Статкевіч пачаў гучна казаць, што ён не зьбіраецца выяжджаць і каб яго вярталі. Ён патрабаваў, каб яму адчынілі дзьверы і ў выніку Мікола выйшаў. Гэта ўсё, што я бачыў. Мікола Статкевіч і сваім жыцьцём, і сваёй дзейнасьцю, і пазыцыяй, даўно даказаў, што мае права ісьці супраць плыні і трымаць тую пазыцыю, якую ён трымае. Ён за гэта разьлічваецца сваім жыцьцём. У гэтым сэнсе я яго абсалютна падтрымліваю. Усе гэтыя дыскусіі, якія ёсьць, павінны быць спыненыя. Ніхто з намі, хто быў у аўтобусе, не вёў з намі размоваў, я маю на ўвазе ўлады Беларусі. Ніхто не пытаў нас згоды і дазволу, каб нас вывозіць. Гэта быў была прымусовая дэпартацыя з уласнай краіны. Тут я на баку Міколы Статкевіча і лічу, што ён меў права павесьці сябе менавіта так. Годна, так як гэта і зрабіў.

«Мікола Статкевіч гэтую гульню Лукашэнкі зламаў»

Аляксандар Фрыдман: Статкевіч даказаў, што ён вельмі мужны, прынцыповы чалавек. Ён беларускі палітык, які ўпэўнены, што беларуская палітыка можа рабіцца толькі ў Беларусі. Лукашэнка можа пасадзіць яго ў турму, можа выкінуць яго зь Беларусі, але пазбавіць яго краіны Лукашэнка на змог. Не атрымалася перакінуць яго ў Літву. Гэтую сыстэму Лукашэнкі Статкевіч зламаў. І Лукашэнка зараз, я думаю, у вельмі супярэчлівай сытуацыі. Вядома, можна ўзяць Статкевіча і кінуць яго яшчэ раз за краты, тут для Лукашэнкі нічога новага. Але гэта будзе выглядаць неяк непрывабна на фоне ўсіх гэтых перамоваў з амэрыканцамі. Пакінуўшы яго на волі, Лукашэнка таксама страціць твар. Ён жа падкрэсьліваў, што ўсе тыя людзі, якіх ён вызваляе, павінны пакінуць Беларусь. А Мікола Статкевіч гэтую гульню Лукашэнкі зламаў. Мне падаецца, што яны разьлічвалі хутчэй на тое, што амэрыканцы разам зь літоўскім бокам угавораць Статкевіча і што ён пагодзіцца. Калі б гэта ўдалося, то можна было б сказаць, што нават такога прынцыповага Статкевіча мы выкінулі ў Літву.