«Сёньня ў Дзяржаўны памежны камітэт Рэспублікі Беларусь прыйшло афіцыйнае паведамленьне Памежнай стражы Рэспублікі Польшчы аб закрыцьці з 1:00 12 верасьня па беларускім часе апошніх дзейных міжнародных пунктаў пропуску на беларуска-польскай мяжы», — працытавала Бычкоўскага дзяржаўнае агенцтва БелТА.
Ён удакладніў, што ідзецца пра аўтамабільныя Берасьце — Тарэспаль і Казловічы — Кукурыкі, а таксама чатыры чыгуначныя пункты пропуску: Горадня — Кузьніца Беластоцкая, Бераставіца — Зубкі Беластоцкія, Свіслач — Сямёнаўка, Берасьце — Тарэспаль.
«Беларускія памежнікі цяпер прымаюць усе магчымыя захады для апэратыўнага афармленьня грамадзян, якія знаходзяцца ў чарзе і спрабуюць перасячы мяжу да закрыцьця руху польскім бокам», — заявіў Бычкоўскі.
Аб закрыцьці пунктаў пропуску на мяжы Польшчы і Беларусі стала вядома 9 верасьня. Як заявіў міністар унутраных спраў і адміністрацыі Польшчы Марцін Кервіньскі, Варшава закрывае мяжу зь Беларусьсю не на пэрыяд вучэньняў «Захад-2025», а «ў сувязі зь іх правядзеньнем».
ГЛЯДЗІЦЕ ТАКСАМА: Польшча ўжыла эканамічную «ядзерную зброю», перакрыўшы мяжу — палітычны аналітык Вадзім Мажэйка